Ճանապարհը

«ԱրմԿոնի» պատմությունը սկսվում է 2007 թվականից, համաշխարհային ճանաչում ստացած, ֆենթզի ժանրում ստեղծագործող Նիք Պերումովի ինտերնետային հարթակից։ Արցախյան արմատներով ռուս գրող Պերումովը և նրա շուրջ հավաքված սկսնակ ստեղծագործողները կազմակերպում էին ժամանակի ընթացքում ավանդական դարձած գրական մրցույթներ։ Այստեղ է, որ պատահաբար «հանդիպեցինք» Ստեփան Սմբատյանի հետ: Ստեփանի և ինձ համար ակամայից պարզ դարձավ, որ երկուսս էլ երազում էինք միավորել մեր երկրում ստեղծագործող սկսնակ հեղինակներին։

​

Գտանք համախոհներ և 2008-2009 թթ․ կազմակերպեցինք առաջին «ԱրմԿոն» մրցույթը։ 17 մասնակիցներ էին, որոնք ներկայացրել էին 27 պատմվածք։

2012-2013 թթ․ կայացած երկրորդ «ԱրմԿոնի» նշաձողն ավելի բարձր էր: Ձգտեցինք, որպեսզի ֆանտաստիկայի ժանրը ներկայացվի հավուր պատշաճի։ Այս անգամ մրցույթն ուներ մասնակիցների ավելի մեծ թիվ և անվանի ժյուրի, որոնց շարքում էին հայ ֆանտաստներ Էդուարդ Սարգսյանը և Ռուսլան Սաղաբալյանը:

Մեր խորհրդատուն երջանկահիշատակ Կարեն Ա. Սիմոնյանն էր, իսկ մասնակիցներին ուղերձով դիմեց աշխարհահռչակ ֆանտաստ գրող Գայ Գևրիել Քեյը։ Կազմակերպեցինք կլոր սեղան և բազմաթիվ քննարկումներ։

Արդյո՞ք մեզ հաջողվեց գոնե որոշ չափով հասնել մեր նպատակին։

​

Ավաղ, մենք հասկացանք, որ պարբերաբար կազմակերպվող գրական մրցույթները բավարար պայման չեն։ Հարկավոր է ամենօրյա տքնաջան աշխատանք։ Ինչպես Կարեն Ա․ Սիմոնյանն էր ասում՝ պետք է ստեղծել «աշխատանոց», որտեղ սկսնակ ստեղծագործողները կստանան համակարգված աջակցություն։

​​

Այս անդրադարձը կուզեի ավարտել Գայ Քեյի ուղերձից մի հատվածով՝

​

«Կցանկանայի հաջողություն մաղթել գրական մրցույթի մասնակիցներին: Հաճախ ասվում է, որ գիտաֆանտաստիկան և ֆենթզին «փախուստի» ոճի գրականություն են: Հնարավոր է, որ դա իրոք այդպես է, սակայն իմ կարծիքով՝ ամենահաջող աշխատանքներն այս ոճում հենց այնպիսիններն են, որոնք փախուստի միջոցով ետ են վերադարձնում տուն:

Նմանօրինակ աշխատությունները լուսավորում են մարդկության ճամփան: Մենք ճանապարհորդում ենք պատմվածքներից ներսուդուրս և արդյունքում ավելի լավ ենք հասկանում մեզ ու մեր կյանքը:

Գուցե ձեր հեղինակներից որևէ մեկը հենց այդպիսի ստեղծագործող դառնա»:

​

Ֆրունզ Հարությունյան

համահիմնադիր, կազմակերպիչ